د شپاړلسمې ناحیې اړوند شپاړلسم ګذر د فاضل آباد او د اوه ویشتم ګذر د الوخېلو په سیمو کې د سړک او لښتي جوړونې د دوو پروژو چارې بشپړې او د کابل ښاروالۍ د برنامو او پروژو د رئیس انجینر میرالرحمن ناصري له خوا، په داسې حال کې چې د یادې ناحیې مسئولین، د سیمو مشران او یوشمېر اوسېدونکي هم حاضر وو د پټۍ په پرېکولو سره پرانیستل شوې. په هغه پرانیست غونډه کې چې له همدې امله جوړه شوې وه، د کابل ښاروالۍ د برنامو او پروژو رئیس خبرې وکړې او ویې ویل: ښاریانو ته د هوساینې او آسانتیاوو رامنځته کولو په موخه به، د ښار په کچه ورته نورې پروژې هم ډیزاین او پلي شي. نوموړي د يادو سيمو له اوسېدونکو غوښتنه وکړه، چې د نويو جوړو شويو سړکونو او لښتیو ساتنې ته جدي پاملرنه وکړي، څو یې له ژر ويجاړېدو څخه مخنیوی وشي. د یادې ناحیې په (۱۶م) ګذر کې د (۵۶۲) مترو په اوږدوالي او (۶) مترو په سور سره سړک، او په (۲۷م) ګذرکې په ټولیزه توګه د (۱۷۱۲) مترو په اوږدوالي، د(۵۰) سانتي مترو په سور او (۶۵) سانتي مترو په ژوروالي سره لښتي، د (۲۰،۴۱) میلیونه افغانیو په لګښت د شپږو میاشتو په موده کې د کابل ښاروالۍ له لوري او د ملګرو ملتونو د پروژوي خدمتونو د دفتر په مرسته په پاخه او اساسي ډول جوړ شوي دي