بشپړ ښاري نظم ته د رسېدو په موخه د کابل ښاروالۍ د مارکیټونو د تنظیم ریاست له لوري د یوولسمې ناحیې اړوند په ګولایي حصه اول، خشت هوختیف، لیسه مریم بازار او نورو ګڼه ګوڼه لرونکو سیمو کې د ښاري نظم پلان پلی او دا سیمې له ښاري بې نظمیو څخه پاکې شوې. د کابل ښاروالۍ د مارکیټونو د تنظیم ریاست مرستیال انجنیر عصمت الله انصار وویل: په دې عملیاتو کې غصب شوې زرغونې سیمې، پلې لارې او سړکونه له ناقانونه خنډونو او تأسیساتو پاک شول او اوس د دې سیمو په بڼه کې غوره بدلون راغلی او د ښاریانو د تګ راتګ په برخه کې آسانتیاوې رامنځته شوې دي. د دې عملیاتو په لړ کې د هټیو مخې ته ناقانونه رغونو او د ګرځنده کراچیو او لاسي توکو پلورونکو فعالیتونو ته هم رسېدنه وشوه او ناقانونه تأسیسات یې ولیږدول شول. د کابل ښاروالۍ د مارکیټونو د تنظیم ریاست پلان لري چې، له اړوند ناحیو سره په همغږۍ د قانون د حاکمیت او ښاري نظم په موخه خپل عملیاتي پلان په بېلابېلو ناحیو کې پلی کړي