د بادام باغ او باغ بالا سیمو ترمنځ د نوي نښلوونکي سړک د جوړولو چارې چې، څه موده وړاندې د کابل ښاروالۍ د کار، ساتنې او مراقبت ریاست له لوري پیل شوې وې، په چټکۍ سره روانې دي. د یاد ریاست د پلونو او سړکونو آمر انجنیر محمد داود ځواب په دې اړه وویل: دغه سړک چې په ټولیزه توګه (۹۰۰) متره اوږدوالی او (۲۰) متره سور لري،چې د یوه معیاري سړک د ټولو برخو په ګډون یې د جوړولو چارې په چټکۍ سره روانې دي. د نوموړي په وینا، د بنسټیزو چارو تر بشپړېدو وروسته د دې سړک (۴۰۰) متره برخه قیر شوې ده او په پاتې نورو برخو یې کار روان دی. کابل ښاروالۍ هڅه کوي ترڅو د دې سړک قیرچارې هرڅه ژر بشپړې شي. دا سړک چې، څلورمه، پنځمه او اوولسمه ناحیه یو له بل سره نښلوي، په جوړېدو سره به یې ښاریانو ته د تګ راتګ په برخه کې ګڼ شمېر آسانتیاوې رامنځته شي. د دې سړک جوړېدل د کابل ښاریانو پخوانۍ هیله وه چې، د ماسټر پلان له مخې یې د جوړولو په اړه اقدام وشو