د پنځمې ناحیې اړوند له قلعه وزیر څخه د خوشحال خان مېنې تر څلوېښت متره سړک پورې د نوي نښلوونکي سړک د پاتې برخې د جوړولو چارې، د کابل ښاروالۍ د کار، ساتنې او مراقبت ریاست له لوري بشپړې شوې. د کار، ساتنې او مراقبت ریاست د پلونو او سړکونو آمر انجنیر محمد داوود ځواب په دې اړه وویل: د (۱۸۵) مترو په اوږدوالي او د (۱۵) مترو په سور سره د دغه سړک د پاتې برخې قیر چارې دبنسټیزو چارو تر بشپړېدو وروسته پیل شوې چې، په راتلونکې اونۍ کې به د ترافیکو پرمخ پرانیستل شي. نوموړي زیاته کړه چې، د دې سړک د یوې برخې چارې د برښنا ستونو او نورو خنډونو د شتون له امله ځنډېدلې وې چې، له برښنا شرکت سره په همغږۍ یادې ستنې ولېږدول شوې او د جوړولو په اړه یې اقدام وشو. کابل ښاروالۍ تېر کال له قلعه وزیر څخه د خوشحال خان مېنې تر څلوېښت متره سړک پورې د (۱۰۸۴) مترو په اوږدوالي او د (۳۰) مترو په سور سره د یاد سړک د جوړولو چارې بشپړې کړې وې چې، اوس مهال به یې د پاتې برخې په بشپړېدو سره په ترافیکي بهیر کې غوره بدلون راشي او د ورڅېرمه سیمو اقتصادي ودې ته به زمینه برابره کړي. د دغه سړک د جوړولو په پروژه کې د لښتي، ګلدانونو او پلو لارو جوړول هم شامل دي