د شپږمې ناحیې اړوند د عدلیې وزارت له مخې څخه د دارالامان تر افشار پورې د سړک د جوړولو چارې چې، په روان کال کې د کابل ښاروالۍ له لوري پیل شوې وې، د بشپړېدو په حال کې دي. د کابل ښاروالۍ د پروژو او برنامو د تنظیم ریاست د زیربنايي پروژو د څارنې آمر په دې اړه وویل: دغه سړک چې په ټولیزه توګه (۲۱۸۶) متره اوږدوالی او (۴۵) متره سور لري، د یوه معیاري سړک د ټولو برخو په ګډون یې د دوو لیکو لومړی پړاو قیر چارې بشپړې او د یوې لیکې دویم پړاو قیرچارې یې د بشپړېدو په حال کې دي او ډېر ژر به د ترافیکو پر مخ پرانیستل شي. نوموړي زیاته کړه: د یادې پروژې بشپړېدو ته (۱۲) میاشتې وخت ټاکل شوې وو. چې له نېکه مرغه دوی وکولای شول دغه پروژه په (۶) میاشتو کې ترسره کړي او اوس مهال یې د روښنایۍ څراغونو ستنو د نصب، د پلو لارو او ګلدانونو په جوړولو کار روان دی چې، تر راتلونکو (۲۵) ورځو پورې به بشپړې شي. د کابل ښاروالۍ انجنیران د پروژې دچارو له کیفیت څخه په دوامداره توګه فني او تخنیکي څارنې کوي. د دې سړک په جوړېدو سره به ښاریانو په ځانګړې توګه د ورڅېرمه سیمو اوسېدونکو ته د تګ راتګ په برخه کې آسانتیاوې رامنځته او د سیمو اقتصادی ودې ته به زمینه برابره شي