دبشپړ ښاري نظم د رامنځته کېدو او د ګڼه ګوڼې د کمښت په موخه، د شلمې ناحیې د مسئولینو له لوري د یادې ناحیې په بېلابېلو سیمو کې د زرغونو سیمو، پلو لارو او سړکونو د غصب مواردو ته رسېدنه وشوه او ناقانونه تاسیسات پاک او ویجاړ شول. د شلمې ناحیې رئیس مولوي عبدالغفور په دې اړه وویل: د دغو عملیاتو په لړ کې د هټیو او مارکیټونو مخې ته ناقانونه رغونو او د ګرځنده پلورونکو او کراچیو فعالیتونو ته رسېدنه وشوه. د نوموړي په وینا؛ د یادو عملیاتو په لړ کې د حفظ الصحې له اړخه د اصنافو فعالیتونه وڅارل شول او دوی هېڅ چاته اجازه نه ورکوي چې، له ښاري اصولو او قوانینو سره په ټکر کې فعالیت وکړي او د ښاریانو روغتیا وګواښي. د ښاري ژوند د قانوني کولو په موخه کابل ښاروالي په بېلابېلو ناحیو کې حمایوي او تقویتي پلانونه پلي کوي او سرغړونکو سره قانوني چلند کیږي