دبشپړ ښاري نظم د رامنځته کېدو او د ګڼه ګوڼې د کمښت په موخه، د اتمې ناحیې د مسئولینو له لوري یو ځل بیا د ښاري نظم د عملیاتي پلان په پلي کولو سره په پلو لارو، زرغونو سیمو او سړکونو کې سرغړونو ته رسېدنه وشوه، جوړ شوي غیر قانوني تاسیسات یې ویجاړ او پاک کړل. د اتمې ناحیې رئیس مفتي روح الله عثماني په دې اړه وویل: د دغو عملیاتو په لړ کې ښاري سرغړونو په ځانګړې توګه غصب شویو ښاري سیمو ته رسېدنه وشوه او اوس مهال د یادې ناحیې بڼې مثبت بدلون موندلی او ښاریانو ته د تګ راتګ په برخو کې آسانتیاوې رامنځته شوې دي. په همدې توګه د هټیو او مارکیټونو مخې ته ناقانونه تاسیساتو، د ګرځنده پلورونکو او ګرځنده کراچیو ناقانونه فعالیتونو ته هم چې، ښاري نظم یې ګډوډ کړی وو رسېدنه وشوه او بدیلو سیمو ته ولیږدول شول. ورته مهال د کابل ښاروالۍ د چاپېریالي روغتیا او چاپېریال ساتنې ریاست مرستیال ډاکتر مسعود فقیر وویل: د یادو عملیاتو په لړ کې د حفظ الصحې له اړخه د اصنافو فعالیتونه وڅارل شول او دوی هېڅ چاته اجازه نه ورکوي چې، له ښاري اصولو او قوانینو سره په ټکر کې فعالیت وکړي او د ښاریانو روغتیا وګواښي