د شپاړلسمې ناحیې اړوند د مرنجان تپې پر سر په آزادۍ تفریحي پارک کې کابل ښاروالۍ غوره کړنې ترسره کړې دي او دا لړۍ اوس هم روانه ده چې، په بشپړېدو سره به یې د ښار ښکلا نوره هم زیاته او دغه سیمه به په یوه مناسب تفریحي ځای بدله شي. د کابل ښاروالۍ د کار، ساتنې او مراقبت ریاست د سړک جوړولو آمر انجنیر محمد داود ځواب په دې وویل: په یاد پارک کې د (۵) میلیونه افغانیو په لګښت، د سړک دواړو خواوو ته د پلولار او ګلدانونو په ګډون، د (۵۰۰) مترو په اوږدوالي او (۱۴) مترو په سور سره یو سړک په بنسټیزه توګه جوړ شوی دی. ورته مهال د کابل ښاروالۍ د زرغونتیا ریاست مرستیال سراج الدین پټان وویل: د دې سیمې د زرغونتیا په موخه، د روان کال په بهیر کې د پخوانیو ونو د څارنې او ساتنې سربېره، سلګونه نور نیالګي هم کینول شوي دي، چې، وضعیت یې د قناعت وړ دی او د یاد پارک په یو شمېر برخو کې چمن هم کرل شوی دی. نوموړي زیاته کړه چې، د مرنجان تپې زرغونتیا ته پراختیا ورکول کیږي څو هرڅه ژر په یوه مناسب او غوره تفریحي پارک بدله شي دغه راز کابل ښاروالۍ به په دې ځای کې، د ځوانانو او ماشومانو لپاره سپورټي لوبغالي، د وسایطو پارکینګ، کانتینونه، اوږدې څوکۍ، سیوري ځای، کټارې، د اوبو فوارې، څراغونه او معیاري ګلدانونه هم جوړ کړي