د کابل ښاروال مولوي عبدالرشید له لوري د کابل ښاروالۍ لخوا له خلکو څخه راټولې شوې مرستې له پاکستان او ایران هېوادونو څخه په اجباري توګه را ستانه شویو هېوادوالو ته د مرستو د جلب او جذب کمېټې ته وسپارل شوې. د خلکو په دې مرستو کې ( ۳۱۲۸۸۹۱) افغانۍ نغدې پیسې، البسه او نور اړین وسایل شامل دي. کابل ښاروال وویل: له بېرته راستنېدونکو هېوادوالو سره مرسته کول د ټولو ملي او دیني دنده ده چې، په دې برخه کې ملي پانګوال او سوداګر باید خپل مسئولیت ادا کړي. نوموړي څرګنده کړه چې، کابل ښاروالي او ښاریان له پاکستان او ایران هېوادونو څخه په اجباري توګه له را ستانه شویو هېوادوالو سره د مرستې کولو په برخه کې چمتو دي او په سختو حالاتو کې مرسته کول د کابل ښاریانو او ټولو افغانانو پخوانۍ غښتلی دود دی. کابل ښاروال په خپلو خبرو کې وویل: راټولې شوې مرستې د ا.ا.ا د مشرتابه د حکم پر بنسټ ټاکل شوې ځانګړې کمېټې ته چې، سرپرستي یې اقتصاد وزارت کوي وسپارل شوې څو، له دې لارې په واقعي اړمنو کسانو ووېشل شي