د کابل ښاروالۍ عوایدي غونډه د کابل ښاروال مولوي عبدالرشید په مشرۍ، د دوه ویشت ګونو ناحیو د رئیسانو او د عوایدو د آمرانو په ګډون ترسره شوه. په غونډه کې کابل ښاروال د عوایدو پلان و ارزاوه او ویې ویل: د کابل ښاروالۍ عواید دې په شفافه توګه راټول او مصرف شي؛ ځکه د کابل ښاروالۍ عواید د ملي عوایدو یوه برخه ده او پر بنسټ یې ښاریانو ته چوپړتیاوې وړاندې کېږي. دغه راز کابل ښاروال د هغو ناحیو مسئولین چې، په عوایدو کې یې ډېروالی راغلی وو وهڅول او د هغه ناحیو مسئولینو ته چې، په عوایدو کې یې کموالی راغلی وو اړینې سپارښتنې وکړې او ویې ویل: د پړاونو آسانه کولو، د کابل ښاروالۍ له پوروړو څخه د پورونو راټولولو په برخه کې دي ګټورې کړنې ترسره شي ترڅو هغه ښاریان چې، کلونه کیږي د ښاروالۍ پوروړي دي خپل حسابونه تصفیه کړي. په همدې توګه کابل ښاروال اړوندو مسئولینو ته سپارښتنه وکړه څو هر څه ژر هغه ښاریان چې د کابل ښاروالۍ پوروړي دي خپل پورونه دې تصفیه کړي؛ له دې پرته به له قانوني چلند سره مخ شي