د کابل ښاروالۍ د کلتوري او ټولنیزو چارو د مرستیال حاجي محمد نبي عثماني له لوري د سرای شمالي سیمې په یوه ګلدان کې د ښاري ښکلا یو سمبول او په همدې توګه زرغونه او ښایسته سیمه ګټې اخیستنې ته وسپارل شول. د کابل ښاروالۍ د کلتوري او ټولنیزو چارو مرستیال د خپلو خبرو په ترڅ کې د ملټ سټیل د اوسپنې ویلې کولو له شرکت څخه چې، د دې سیمې په ښکلا کې یې برخه اخیستې ده مننه وکړه او ویې ویل: اړتیا ده چې، ټول سوداګر او متشبیثین له کابل ښاروالۍ سره د ښاري ښکلا په برنامه کې برخه واخلي، څو د ښار بڼه نوره هم مثبت بدلون ومومي. ورته مهال د کابل ښاروالۍ د کلتوري چارو رئیس قاري ولي ګل جواد وویل: په دې سیمه کې د (۷۰۰) متر مربع په پراخوالي سره غصب شوې ځمکه بېرته راوګرځول شوه او د ښاري ښکلا پروګرام پکې پلی شو. په دغه پروژه کې د (۱۳)مترو په لوړوالي د ښاري ښکلا یو سمبول، تبلیغاتي سکرین، د ګلدان او د اوبو د فوارو جوړول، د چمن کرل، د جدولونو او کټارو نصب او د سیمې د خړوب په موخه، د یوې څاه کېندل شامل دي چې، د (۳) میلیونه افغانیو په لګښت، د شپږو کاري میاشتو په موده کې بشپړې شوې