کابل ښاروال مولوي عبدالرشید د افغانستان د سوداګرو او پانګوالو د ټولنې له اجرایوي رئیس حزب الله الفت او د دغې ټولنې له یو شمېر غړو سره وکتل او د پانګوالو او سوداګرو لپاره یې د آسانتیاوو د رامنځته کولو په اړه بحث او خبرې وکړې. په دې لیدنه کې کابل ښاروال د ښاري آسانتیاوو په ځانګړې توګه د پانګوالو او سوداګرو لپاره د کاري فرصتونو رامنځته کولو په برخه کې یو ځل بیا خپله ژمنه تازه کړه او ځان یې د ټولو ښاریانو خدمتګار وباله. نوموړي وویل چې، د هېواد په اقتصادي وده کې د رښتنیو ملي سوداګرو او پانګوالو رول مهم دی او له هغوی څخه د ملاتړ په برخه کې یې خپل پلانونو او پروګرامونه په ډاګه کړل. کابل ښاروال له سوداګرو او ملي پانګوالو وغوښتل چې، د ښار د آبادۍ په برخه کې له کابل ښاروالۍ سره مرسته وکړي. د ناستې په پای کې د ښار د آبادۍ او پرمختګ په برخه کې د غوره کړنو ترسره کولو په موخه، د افغانستان د ملي پانګوالو او سوداګرو ټولنې له لوري چمتو شوی ستاینلیک د یادې ټولنې د رئیس حزب الله الفت له لوري کابل ښاروال ته ورکړل شو