د لومړۍ ناحیې د مسؤلینو له خوا د پل خشتي جومات مخې ته سړک او پلې لارې چې، د ګرځنده پلورونکو او کراچېو له خوا بندې شوې وې پاک او په دغه سیمه کې د ښاریانو د تګ راتګ په برخه کې آسانتیاوې رامنځته شوې دي. د لومړۍ ناحيې رئیس مولوي محمد عالم عاصم په دې اړه وويل: د ښاري نظم د ټینګښت په موخه، ګرځنده پلورونکي او لاسي کراچۍ نورو سيمو ته لېږدول شوي او د دې سيمې نظم د مسؤلينو تر کنټرول لاندې دى. ښاغلي عاصم زیاته کړه: د جوړ شوي ډیزاین له مخې به د پل خشتي جومات له مخې څخه د سپاهي ګمنام تر چوک پورې شنه سیمه جوړه شي چې، له یوې خوا به د سیمې ښکلا زیاته او بل خوا به په یاده سیمه کې تلپاتې ښاري نظم ټینګ شي