د پنځلسمې ناحیې اړوند ۲۳م ګذر د ګلوبل ښارګوټي په سیمه کې له تيږو څخه د سړک جوړلو چارې چې، څه موده وړاندې د کابل ښاروالۍ له لوري او د ملګرو ملتونو دپروژوي خدمتونو د دفتر په مرسته پیل شوې وې، په چټکۍ سره روانې دي. د کابل ښاروالۍ دبرنامو او پروژو د تنظیم رياست د معلوماتو له مخې: دغه سړک چې، (٣٦٤) متره اوږدوالى او (۱۰) متره سور لري، د پلو لارو او لښتي جوړول هم په کې شامل دي او هڅه کېږي تر څو ژر تر ژره بشپړ او ګټې اخیستنې ته وسپارل شي. له تيږو څخه د سړکونو جوړول، د لوړ مقاومت سربیره، د ځمکې لاندې اوبو په زیرمه کولو کې ځانګړی اهمیت لري. د یادونې وړ ده چې، دغه پروژه د ښاریانو د سیمه ییزو ستونزو د حل او د کار د زمینې د برابرولو په موخه ډیزاین او پلې شوې ده