کابل ښاروال مولوي عبدالرشید د افغانستان د کسبګرو او هټیوالو خونې له رئیس شیرین آغا او د یادې خونې له غړو سره د بېلابېلو اصنافو د وضعیت غوره کېدو په اړه بحث او خبرې وکړې. کابل ښاروال د کسب کارانو او هټیوالو خونې د غړو نظرونه واورېدل او ویې ویل: اصنافو ته د ښاري آسانتیاوو رامنځته کول لومړیتوب او ژمنه یې وکړه چې، د ښاریانو د خادم په توګه به ټولو چاپیریالي ستونزو ته پر وخت رسېدنه وکړي. نوموړي د ښار اقتصادي وده د هټیوالو او کسبګرو په شتون پورې تړلې وبلله او له دوی څخه د ملاتړ په برخه کې یې خپل پلانونه شریک کړل. کابل ښاروال د یادې خونې له غړو څخه د ښاري نظم په رامنځته کېدو او د ښار د اقتصادي ودې په برخه کې د همکارۍ غوښتنه وکړه. کابل ښاروال د اصنافو استازو ته ډاد ورکړ چې، د ښاري خدمتونو او د لوحو د ټکس د محصول په ورکولو، صنفي او د فعالیت جواز اخیستلو په برخه کې به له ښاري مقرراتو سره سم چلند کیږي او له فساد سره د مبارزې په برخه کې به شریک کار کوي