د کابل ښاروالۍ د چاپیریالي څارنو په لړ کې د څلورمې ناحیې په اړوند سیمو کې د شپې پر مهال د هوا ککړونکې سرچينې وپلټل شوې او له سرغړونکو څخه سربېره پر دې چې اړینې سپارښتنې ور ته وشوې، ژمنه هم ترې واخیستل شوه څو هرڅه ژر د خپلو مرکز ګرمیو سیسټم لپاره د لوګي د تصفیې فلټر نصب او فعال کړي. د کابل ښاروالۍ د چاپیریالي روغتیا او چاپېریال ساتنې ریاست مرستیال ډاکتر مسعود فقیر په دې اړه وویل: د کابل هوا له ککړتیا څخه د مخنیوي په موخه، د ودانیو د مرکز ګرمۍ سیسټم لپاره فلټرباید فعال وي او له سرغړونکو سره به قانوني چلند وشي. د دغو څارنو او پلټنو په لړ کې د یوه روغتون مسئولین چې، د مرکز ګرمۍ په سیسټم کې یې له کلینیکي کثافاتو ګټه اخیستله وپېژندل شول او دوی ته خبر داری ورکړل شو چې، د بیا ځلي سرغړونې په صورت کې به له قانوني چلند سره مخ شي. د طبي کثافاتو د ښه مدیریت او له هغو څخه د را پیدا کېدونکو زیانونو د مخنیوي په موخه، له دې وړاندې هم د روغتونونو مسؤلینو ته سپارښتنه شوې چې، د خپلو طبي کثافاتو په جلا کولو، ټولولو، لېږدولو او سوځولو کې جدي پاملرنه وکړي، لارښوونې عملي کړي او د چاپېریال له ککړتیا څخه ډډه وکړي