ښاریانو ته د ښاري او ترانسپورتي آسانتیاوو رامنځته کولو په موخه، د بادام باغ او باغ بالا ترمنځ د نښلوونکي سړک د جوړولو چارې چې، څه موده وړاندې د کابل ښاروالۍ له لوري پیل شوې وې، تر دې دمه (۸۲) سلنه مخته تللې دي. د کار، ساتنې او مراقبت ریاست د پلونو او سړکونو د آمر انجنیر عزت الله ځواب په وینا؛ دغه سړک په ټولیزه توګه (۹۰۰) متره اوږدوالی او (۲۰) متره سور لري، چې د یوه معیاري سړک ټولې برخې پکې شاملې دي. د نوموړي په وینا اوس مهال د ژمنیو تدابیرو په نیولو سره د یاد سړک د پاتې برخې په خاورینه برخه او د غره د لمنې په هوارولو او کیندلو کار روان دی. ښاغلي ځواب زیاته کړه چې، څه موده وړاندې د دغه سړک (۴۰۰) متره برخه قیر شوې ده او هڅه کیږي چې، هرڅه ژر یې قیر چارې هم بشپړې شي. د یادولو وړ ده چې، دغه سړک څلورمه، پنځمه او اوولسمه ناحیه یو له بل سره نښلوي چې، په جوړېدو سره به یې د اړوندو سیمو ترافیکي حجم ووېشل شي