د لوحو، اعلانونو او تابلوګانو د اصلاح کمیسیون له لوري له انصاري تر طره بازخان څلورلارې پورې د سړک په اوږدو کې په بهرنیو ژبو لیکل شوې او یا هغه لوحې چې، د ښار بڼې ته یې زیان رسولی وو راټولې او پاکې شوې. د کابل ښاروالۍ د کلتوري چارو رئیس قاري ولي ګل جواد وویل: د لوحو او اعلانونو د اصلاح کولو په لړ کې هغه لوحې او تابلوګانې چې، په بهرنیو ژبو لیکل شوې وې او یا هم پکې غیر شرعي انځورونه او ناسم متن لیکل شوی وي او په نامناسبو ځایونو کې نصب شوې وې، راټولیږي. هغه کلیمې چې، په ملي ژبو کې نه وي له دې امر څخه مثتثنی دي. نوموړي وویل چې، سرغړونکو ته جدي لارښوونه شوې ترڅو هرڅه ژر، د اصلاحاتو له لارښود سره برابر چلند وکړي؛ له دې پرته به ورسره قانوني چلند وشي. کابل ښاروالي د لوحو او تابلوګانو د اصلاح کمیسیون د غړي په توګه د ښار په کچه خپلو فعالیتونه پراخوي او په دې برخه کې جدي کار کوي