د کابل ښاروالۍ د مارکېټونو د تنظیم ریاست مسؤلینو په دې وروستیو کې د کابل ښار له بازارونو څخه د څارنې او کنټرول په ترڅ کې، له هټیوالو څخه تر ۶ ټنو زیات کم وزن لرونکې د تلې (ترازو) ډبرې راټولې او د له منځته وړلو په موخه یې ټاکلي ځای ته ولېږدولې. د کابل ښاروالۍ د مارکېټونو د تنظیم ریاست مرستیال انجنیر عصمت الله انصار په دې اړه وویل: د تلې (ترازو) ډبرې باید معیاري وي او هټیوال باید خپل توکي په ټاکلي وزن سره وپلوري، له دې پرته به سرغړونکي له قانوني چلند سره مخ شي. ښاغلي انصار زیاته کړه، اوس مهال يو شمېر هټيوال د خپلو توکو د پلورلو لپاره له زړو تلو ( ترازوګانو) او غیر معیاري ډبرو څخه کار اخلي، په داسې حال کې چې نور يې برېښنايي يا ډيجيټلي تلې (ترازو) کاروي، چې د دوی د کارولو څرنګوالی به د اصولو او مقرراتو له مخې وڅارل شي