د ښاري سالم چاپېریال د ساتلو او د هوا له ککړتیا څخه د مخنیوي په برخه کې د فردي او ټولنیزو مسئولیتونو د پېژندلو په موخه د کابل ښاروالۍ د خپرونو او عامه پوهاوي ریاست له لوري له نهمې ناحیې له اوسېدونکو سره د عامه پوهاوي غونډه ترسره شوه. د خپرونو او عامه پوهاوي رئیس قاري واسع الله زاهد له دې غونډې څخه موخه د ښار پر وړاندې د مسئولیت منلو احساس را ژوندي کول وبلل و ویې ویل: ټول ګډ مسئولیت لرو ترڅو د هوا له ککړتیا څخه په مخنیوي او د سالم ښاري چاپېریال د رامنځته کولو په برخه کې دیني او ملي مسئولیت ادا کړو. نوموړي د ښاري اصولو او مقرراتو د په پام کې نیولو په برخه کې د سیمه ایزو شوراګانو او د اصنافو رول ګټور وباله او له دوی یې غوښتنه وکړه چې، له کابل ښاروالۍ سره په دې برخه کې همکار و اوسي. ګډونوالو هر یوه په خپل وار سره د سالم ښاري چاپېریال په رامنځته کېدو ټینګار وکړ او ویې ویل چې، ټول باید په ګډه د هوا له ککړتیا څخه د مخنیوي په برخه کې خپل مسئولیت ادا کړو، د زرغونو سیمو په ساتلو کې مرسته وکړو، کثافات په بې ځایه ځایونو کې ونه غورځوو او د ټولو عامه ښاري تاسیساتو ساتلو ته پام وکړو. په دې غونډه کې د چاپېریال ساتنې اړوند یو شمېر ویډیويي کلپونه نندارې ته وړاندې شول چې، د ګډونوالو ته د خوښې وړ وګرځېدل