د کابل ښار د ۱۱مې ناحیې اړوند د خیرخانې مېنې د لومړۍ برخې د ګولايي پارک د بیارغونې چارې چې، څه موده وړاندې د کابل ښاروالۍ د زرغونتیا ریاست له خوا پیل شوې وې، د بشپړیدو په حال کې دي. د کابل ښاروالۍ د زرغونتیا رئیس مولوي عبدالوکیل متوکل په وینا؛ د دغه پارک د بیا رغونې په پروژه کې د احاطې، له تیږو څخه د پلولارو، د اوږدو څوکیو ، سیوري ځای، د اداري ودانۍ او شنې خونې جوړول، د ماشومانو لپاره د لوبو د وسایلو نصبول، د چمن کرل، د ونو د څانګو پرې کول او د اوبولګولو سیسټم رامنځته کول شامل دي، چې چارې یې بشپړې شوې دي. نوموړي زياته کړه، دغه پارک په ټوله کې (٩٨٠٦٤) متر مربع مساحت لري، چې، ( ٣٤٧٦) ډوله نيالګي او (١٥٠٠) بوټي د مرسل ګلان پکې شته دي او په راتلونکي کې به د روښنایي په سيستم هم سمبال شي. د زرغونتیا ریاست اړوند مسؤلین به په دوامداره توګه د دغه پارک ساتنه او پالنه کوي، څو د ښاریانو د تفریح لپاره په یوه مناسب ځای او معیاري پارک بدل شي