د کابل ښاروالۍ د خپرونو او عامه پوهاوي ریاست لخوا د ښاري کلتور د دودولو په اړه د لسمې ناحیې اوسېدونکو له اوسېدونکو سره د عامه پوهاوي غونډه ترسره شوه. د لسمې ناحیې رئیس مولوي نورالوهاب نوري د ښاري مسایلو په اړه د خلکو پوهاوی اړین وباله او ټینګار یې وکړ چې، د لسمې ناحیې اوسېدونکي دې د ښاري برنامو او پلانونو په پلي کولو کې له کابل ښاروالۍ سره مرسته وکړي. ورته مهال د عامه پوهاوي آمر محمد یاسین امین په خپلو خبرو کې وویل: د ښار د آبادۍ او سمسورتیا په برخه کې ټول ګډ مسؤلیت لرو او اوس د دې وخت را رسېدلی چې، د ښاري ژوند د هوساینې لپاره خپل فردي او ټولنیز مکلفیتونه ادا کړو. نوموړي د غوره ښاري نظم رامنځته کولو او د ښاري اصولو او مقرراتو په برخه کې د سیمه ییزو شوراګانو او د اصنافو رول مهم وباله او غوښتنه یې وکړه چې، د هوا له ککړتیا سره د مبارزې په برخه کې له کابل ښاروالۍ سره مرسته وکړي. د لسمې ناحیې د اوسېدونکو په استازیتوب مولوي عبدالعزیز راتب خبرې وکړې او ژمنه یې وکړه چې، د سالم ښاري چاپېریال د رامنځته کولو، د ونو او زرغونو سیمو او د ښاري تاسیساتو د ساتنې په برخه کې به له کابل ښاروالۍ سره مرسته کوي. د غونډې په پای کې د ښاري اصولو او مقرراتو په اړه یو شمیر ويډيويي کلېپونه نندارې ته وړاندې شول چې د ګډونوالو د خوښې وړ وګرځېدل