د کابل ښاروالۍ د ښاري خدمتونو او چاپېریال ساتنې مرستیال مولوي محمد خالد سجستاني په پغمان او د قرغې د زرغون کمربند په سیمه کې د کابل ښاروالۍ د زرغونتیا ریاست له قوریو څخه لیدنه وکړه او د نیالګیو د ساتنې،پالنې او لیږدولو په اړه یې مسئولانو ته اړینې لارښوونې وکړې. ښاغلي سجستاني د زرغونتیا ریاست له هڅو مننه وکړه چې، په خپل اړوند شنو خونو کې یې دوه میلیونه نباتي بوټي په معیاري توګه تربیه کړي دي او د یادو قوریو د لا بډاینې په برخه کې یې خپل نظریات شریک کړل. نوموړي د زرغونتیا مسئولانو ته په ټینګار سره وویل: هغه نیالګي چې، ټاکل شوې ده د ښار په کچه کینول شي، د سیمې ډول او خاصیت باید په نظر کې ونیول شي. د کابل ښار د زرغونتیا او سمسورتیا لپاره اوس مهال دوه میلیونه بېلابېل نباتي بوټي تر پالنې لاندې دي چې، له ډلې به یې یو میلیون او ۶ سوه زره د ۱۴۰۳ کال د نیالګیو کېنولو په موسم کې د کابل ښار په بېلابېلو برخو کې کېنول شي. له دې ډلې یو میلیون یې مرسل ګلان او نور زینتي بوټي او ۶ سوه زره یې میوه لرونکي او بې میوې نیالګي دي. د کابل ښاروالۍ د زرغونتیا ریاست په کابل ښار کې ۲۰ قوریې او شنې خونې لري چې، تر ټولو مهمه یې د پغمان سیمې او د قرغې بند په زرغون کمربند کې نوې قوریه ده