د کابل ښاروالۍ په وړاندیز او د ریاست الوزرا د محترم مقام په منظورۍ، محترم مولوي محمود محمدزاده د کابل ښاروالۍ د اتلسمې ناحیې د نوي رئیس په توګه ټاکل شوی او د کابل ښاروالۍ د مقام دفتر د رئیس حافظ عبدالقدير حقاني له خوا خپلو همکارانو ته ور وپېژندل شو. په هغه پېژند غونډه کې چې له همدې امله جوړه شوې وه، د کابل ښاروالۍ د مقام د دفتر رئیس د چارو د چټکتیا او همغږۍ په اړه دکابل ښاروالۍ د مشرتابه سپارښتنې څرګندې کړې او ویې ویل: په اداره کې د چارو د ښه والي او چټکتیا په موخه، د مسئولینو ګمارل او بدلون یو اصل دی،ښاغلی محمد زاده یو ژمن، صادق او د ښې کاري تجربې لرونکی شخص دی. نوموړی تر دې وړاندې د کابل ښاروالۍ د څوارلسمې ناحیې د مرستیال په توګه دنده ترسره کوله او د کاري اجرااتو د ارزونې پر بنسټ، د اتلسمې ناحیې د نوي رئیس په توګه په دنده وګمارل شو. د مقام د دفتر رئیس هیله څرګنده کړه چې، د اتلسمې ناحيې نوي رئیس به خپلې چارې په پوره ايماندارۍ او ريښتینولۍ سره پرمخ بوځي، تر څو د چارو په ترسره کولو کې ښه والی رامنځته او د ښاريانو رضايت ترلاسه شي