( د نیالګیو کېنول؛ د وچکالۍ لمنځه وړل) تر شعار لاندې د ۱۴۰۳ کال د نیالګیو کېنولو ملي کمپاین د ریاست الوزرا د مرستیال مولوي عبدالکبیر له لوري د کابل په بادام باغ فارم کې د لومړني نیالګي په کېنولو سره پیل شو. په دې مراسمو کې د ریاست الوزرا د مرستیال سربېره د کرنې اوبو لګولو او مالدارۍ وزیر مولوي عطاالله عمري، د کابل ښاروالۍ د زرغونتیا رئیس مولوي عبدالوکیل متوکل، او د ا.ا.ا یو شمېر نورو لوړ پوړو چارواکو ګډون کړی وو. دوی ټولو د کابل ښار او د هېواد د نورو سیمو د زرغونتیا په موخه له هېوادوالو څخه وغوښتل چې، فرصت له لاسه ورنه کړي او په دې ملي کمپاین کې برخه واخلي. د کابل ښاروالۍ د زرغونتیا رئیس وویل چې، په دې موسم کې کابل ښاروالۍ شاوخوا دوه میلیونه نیالګي او زینتي بوټي چمتو کړي دي او د کابل ښار په بېلابېلو برخو کې به کېنول شي. کابل ښاروالي به ډېر ژر د ښاریانو په ګډون د کابل ښار په دوه ویشت ګونو ناحیو کې د نیالګیو کېنولو کار پیل کړي، ترڅو کابل په یوه زرغون او ښایسته ښار بدل شي