د کابل ښاروالۍ د مسئولینو او د دوه ویشت ګونو ناحیو د دیني عالمانو، ګذر وکیلانو او ځوانانو شوراګانو د استازو ترمنځ د ۱۴۰۳ کال د نیالګیو کېنولو پسرلني کمپاین په اړه مشورتي غونډه ترسره شوه. د یادې ادارې مسئولینو د زرغونو سیمو په پراختیا کې د سیمه ییزو شوراګانو رول مهم وباله او هیله یې څرګنده وکړه چې، هر ښاري باید د خپل ملکیت مخې ته نیالګي کینوي او له کابل ښاروالۍ سره د زرغونتیا اړوند پلانونو په پلي کولو کې مرسته وکړي. کابل ښاروالي د کابل ښار په کچه اوسنۍ زرغونې سیمې کافي نه بولي او د ددغو سیمو د پراختیا په برخه کې د نیالګیو کېنولو موسم یو ښه فرصت ګڼي. ورته مهال د ناحیو د سیمه ییزو شوراګانو استازو ژمنه وکړه چې، په خپلو اړوند سیمو کې به نیالګي کېنوي او په دوامداره توګه به ترې ساتنه او پالنه کوي