د دولسمې ناحیې په ۱۲م ګذر د احمدشاه بابا مېنې پروژې په سیمه کې د دوه فرعي سړکونو د جوړولو چارې بشپړې او د کابل ښاروالۍ دبرنامو او پروژو د تنظیم رئیس انجنیر میرالرحمن ناصري له خوا، په داسې حال کې چې، د دولسمې ناحيې رئیس مولوي ګل علي عثمان، مشرانو او ځايي اوسېدونکو یې ملتیا کوله ګټې اخیستنې ته وسپارل شول. د کابل ښاروالۍ د برنامو او پروژو دتنظیم رئیس وویل دا پروژه د کابل ښاروالۍ له لوري د ملګرو ملتونو د پروژوي خدمتونو ادارې په مرسته د محرومو سیمو اوسېدونکو ته د آسانتیاوو او کاري بوختیاوو رامنځته کولو په موخه طرحه شوې وه. دا فرعي سړکونه په ټولیزه توګه (۷۵۰) متره اوږدوالی او (۵) متره سور لري، د لښتیو په ګډون د (۸) میلیونه افغانیو په لګښت د دوه نیمو میاشتو په موده کې جوړ شوي دي. ښاغلي ناصري زياته کړه: د يادو سړکونو په جوړېدو سره د ځایي اوسېدونکو ستونزې هوارې، او هغوى ته غوره ترانسپورتي او ټولنيزې آسانتیاوې رامنځته شوې دي. دغه راز نومړي ډاډ ورکړ چې، په راتلونکي کې به د ښاریانو د ستونزو د هواري په موخه، ورته نورې پروژې هم پلې شي