کابل ښاروالي پلان لري چې، هر څه ژر د دوه ویشتمې ناحیې اړوند له بت خاک څلورلارې څخه تر حلقوي سړک پورې د نوي نښلوونکي سړک د جوړولو چارې پیل کړي. د کابل ښاروالۍ د استملاک درئیس انجینیر عبدالمتین حنیف په وینا، د یاد سړک پر اوږدو کې (۷۰) ملکیتونه تر استملاک لاندې دي چې، د قانون له مخې (۹۰) سلنه مالکانو ته یې بدیل حقونه ورکړل شوي او پاتې نورو ته به یې هم ډېر ژر ورکړل شي. نوموړي زياته کړه، چې د یاد سړک په اوږدو کې تر استملاک لاندې د يو شمېر خنډونو او کورونو د ويجاړولو او پاکولو چارې څه موده وړاندې ترسره شوې او د پآتې نورو به یې په نږدې راتلونکو ورځو هم ترسره شي. د ماسټر پلان له مخې د یاد سړک جوړول، د کابل ښاورالۍ لومړیتوب او دښاریانو له پخوانیو هیلو څخه ده. دغه سړک (۱۳۲۵) متره اوږدوالی او(۴۵) متره سور لري چې، په جوړېدو سره به یې د ښاریانو پر وړاندې شته ترافیکي ستونزې حل او دوی ته به ګڼ شمېر ټولنیزې او ښاري آسانتیاوو رامنځته شي