د کابل ښاروالۍ د خپرونو او عامه پوهاوي ریاست له لوري د دیارلسمې ناحیې له اوسېدونکو سره د ښاري کلتور دودولو په اړه د ګڼ شمېر ښاریانو په ګډون د عامه پوهاوي غونډه ترسره شوه. په دې غونډه کې د دیارلسمې ناحیې رئیس مولوي عبدالصمد عابد له ښاري مسایلو خبرېدل د هر ښاري مسئولیت وباله او هیله یې وکړه چې، د ښاري مدیریت په برخو کې د یادې ناحیې اوسېدونکي له کابل ښاروالۍ سره همکار و اوسي. په همدې توګه د کابل ښاروالۍ د عامه پوهاوي آمر محمد یاسین امین وویل: د سیمې د پاک ساتلو، د زرغونو سیمو د پراختیا او چاپېریال ساتنې په برخه کې ښاریان ګډ مسئولیت لري او باید په دې برخو کې له کابل ښاروالۍ سره همکار و اوسي. د غونډې ګډونوالو په خپل وار د ښاري پلانونو په پلي کولو کې له کابل ښاروالۍ سره د همکارۍ چمتوالی وښود او ژمنه یې وکړه چې، د خپلې سیمې پاک ساتلو، نظم او زرغونتیا ته به پام کوي. په غونډه کې د ښاري کلتور اړوند یو شمېر ویډیويي کلپونه هم نندارې ته وړاندې شول