د اوومې ناحیې په ۲۶م، ۲۷م او ۲۸م ګذر کې د کوڅو جوړونې دوه پروژې بشپړې او د اوومې ناحیې د رئیس مولوي عبدالغفور غفوري او دکابل ښاروالۍ د برنامو او پروژو د تنظیم ریاست د استازي انجینر ذبیح الله رحیمي له خوا، په داسې حال کې چې د سیمې مشرانو او یوشمېر اوسیدونکو هم شتون درلود ګټې اخیستنې ته وسپارل شوې. په هغه پرانیست غونډه کې چې له همدې امله په یاده سیمه کې جوړه شوې وه، د اوومې ناحيې رئیس په خپلو خبرو کې وويل: د يادو کوڅو په جوړيدو سره د ځایي اوسېدونکو ستونزې هوارې او دوی ته ترانسپورتي او ټولنيزې آسانتياوې رامنځته شوې دي. نوموړي د سیمې له اوسېدونکو څخه غوښتنه وکړه چې، د خپلو نویو جوړو شویو کوڅو ساتنې ته پاملرنه وکړي. دغه راز دکابل ښاروالۍ د برنامو اوپروژو د تنظیم رياست استازي په دې اړه وويل: دغه پروژې دکابل ښاروالۍ له خوا او دملګرو ملتونو دپروژوي خدمتونو د دفتر په مرسته، ښاريانو ته د آسانتیاوو رامنځته کولو او دکار د زمينې دبرابرولو په موخه پلې شوې دي او په راتلونکي کې به هم له ښاري آسانتیاوو څخه د محرومو سیمو د اوسېدونکو د ستونزو د هوارۍ په نیت ورته نورې پروژې هم طرحه او پلې شي. نوموړي زیاته کړه، د دې ناحیې په ۲۶م او ۲۸م ګذر کې د کوڅې جوړولو پروژه چې، (۱۱۶۰) متره اوږدوالۍ او له (۴ څخه تر ۵) مترو پورې سور لري، دلښتيو په ګډون د (۱۰،۲) میلیونه افغانیو په لګښت، او په ۲۷م ګذر کې د کوڅې جوړولو پروژه، چې (۱۲۰۰) متره اوږدوالی او له (۴ څخه تر ۴،۵) مترو پورې سور لري، دلښتیو په ګډون د (۹،۳) میلیونه افغانیو په لګښت، د پنځو میاشتو په موده کې بشپړې شوې چې، په هره پروژه کې د شاوخوا (۲۰۰) کسانو لپاره د کار زمینه برابره شوې وه.