د شپږمې ناحیې اړوند په ۳م ګذر دسړک او په ۱۵م ګذر کې د کوڅې جوړولو چارې بشپړې او د کابل ښاروالۍ د ودانیزو چارو مرستیال انجینرعامر یاسر زمرک له خوا په داسې حال کې چې د سیمې یو شمېر مشران او اوسېدونکي هم حاضر وو، ګټې اخیستنې ته وسپارل شول. په هغه پرانیست غونډه کې چې له همدې امله په یاده سیمه کې جوړه شوې وه، د کابل ښاروالۍ د ودانیزو چارو مرستیال د خبرو په ترڅ کې، په راتلونکي کال کې د سړک جوړولو د نویو پروژو د پیل خبر ورکړ او ویې ویل: له ښاري آنتیاوو څخه د محرومو سیمو د ستونزو د هواري په موخه به، ورته نورې پروژې هم طرحه او پلي شي، ترڅو د یادو سیمو د اوسیدونکو ستونزې هوارې او دوی ته ترانسپورتي او ټولنیزې آسانتیاوې رامنځته شي. ښاغلي یاسر زیاته کړه، دغه پروژې د کابل ښاروالۍ له خوا او د ملګرو ملتونو د پروژوي خدمتونو د دفتر په مرسته، ښاريانو ته دغوره خدمتونو د وړاندې کولو او د کار د زمينې د رامنځته کولو په موخه، پلې شوې دي. دغه راز نوموړي له ښاریانو غوښتنه وکړه چې، د خپلو نويو جوړو شويو سړکونو او کوڅو ساتنې ته پاملرنه وکړي. همدارنګه د کابل ښاروالۍ د برنامو او پروژو دتنظیم رئیس انجنیر میرالرحمن ناصري خبرې وکړې او ویې ویل: د ۳م ګذر اړوند د ډبرو سکرو میدان په نوم سیمه کې د (۲) مترو ګلدان په ګډون د (۳۸۲) مترو په اوږدوالي او له (۱۲ څخه تر ۱۴) مترو په سور سړک د (۸،۵) میلیونو افغانیو په لګښت او د۱۵م ګذر اړوند د قلعه ناظر او لب جر په سیمه کې د(۶۷۹) مترو په اوږدوالي او له( ۳،۵ څخه تر ۴) مترو په سور کوڅه د (۴،۸۵) میلیونه افغانیو په لګښت، د(۵)میاشتو په موده کې په معیاري او اساسي ډول جوړ شوي دي. د یادولو وړ ده چې، په دغو پروژو کې هره پورځ شاوخوا (۲۰۰) کسانو ته د کار زمینه هم برابره شوې وه