د دوولسمې او یو ویشتمې ناحیې اړوند د قلعه زمان خان له شپېته متره څخه د کابل- جلال آباد تر سړک پورې د قلعه شانان سړک د جوړېدو پر وړاندې د شته خنډونو او ملکیتونو د پاکولو، خاورې لیږدولو او هوارولو چارې پیل شوې. د کابل ښاروالۍ د استملاک ریاست سرپرست انجنیر امید الرحمن رحمانی په دې اړه وویل: د دې سړک په اوږدو کې(۵۲) ملکیتونه تر استملاک لاندې دي چې، د قانون له مخې به یې مالکانو ته حقونه ورکړل شي. نوموړي زیاته کړه چې، د یاد سړک جوړېدل د ماسټر پلان له مخې تر سره کېږي ترڅو د کابل ښار اقتصادي ودې ته زمینه برابره شي. د کابل ښاروالۍ د پروژو او برنامو د تنظیم ریاست د معلوماتو پر بنسټ، د دغه سړک د جوړولو او پراختیا چارې به د خنډونو له پاکولو وروسته پیل شي. دغه نښلوونکی به د کابل ښاروالۍ د ښاري زیربناوو د ریاست له خوا د ډیزاین شوې طرحې له مخې، د (۲۱۰۳) مترو په اوږدوالي او (۳۰ ) متره سور سره د اوبو یوه کانال او د یوه معیاري سړک د ټولو جزئیاتو په ګډون د یو کاري کال په موده کې بشپړ شي. د دې سړک جوړېدل د کابل ښاریانو پخوانۍ هیله وه چې، اوس د ترسره کېدو په حال کې ده او په بشپړېدو سره به یې د کابل- جلال آباد سړک ترافیکي ستونزې هوارې او ورسره جوخت به ګڼ شمېر ښاري آسانتیاوې هم رامنځته شي