د کابل ښاروالۍ د زرغونتیا ریاست د ښار په کچه د نيالګيو کېنولو د کمپاين په لړ کې، د قرغې بند په سیمه کې د زرګونو مېوه لرونکو او بې مېوې نيالګېود کېنولو پلان تر لاس لاندې لري. د کابل ښاروالۍ د زرغونتیا رئیس مولوي عبدالوکيل متوکل په دې اړه وويل: د یوه ښکلي او زرغون ښار د درلودلو په موخه به، یاده سیمه په يوه مناسب او ښکلې تفريحي ځای بدله شي. نوموړي زیاته کړه، د کابل ښار د زرغونتیا او ښکلا په نیت، د زرغونتیا ریاست ګڼ شمېر پلانونه تر لاس لاندې لري چې په بېلابېلو پړاوونو کې به پلي شي. یو له د غو پلانونو څخه د قرغې بند په سیمه کې د زرغون کمربند پراخول دي چې، د ۱۴۰۳ کال د پسرلني کمپاین له پیل راهیسې په دغه ځای کې تر (۵۰۰۰)زیات نیالګي کینول شوي او د کېنول شویو نیالګیو د ساتنې او ښې پالنې لپاره مناسبې لارې چارې په پام کې نیول شوي دي. ښاغلي متوکل وويل: د ځنګلونو او زرغونو سیمو رامنځته کول، له یوې خوا د موسمي اورښتونو لامل ګرځي او له بلې خوا زرغون کمربند په حقيقت کې د چاپېريال لپاره د یوه فلټر حیثیت لري