د نهمې ناحیې اړوند د هوایي ډګر له څلورلارې څخه د کابل جلال اباد سرک د ګمرک تر سیمې پورې د نوي نښلوونکي سړک د جوړولو پر وړاندې د خنډونو او تر استملاک لاندې ملکیتونو د ویجاړولو او پاکولو چارې، دکابل ښاروالۍ له خوا پیل شوې. د کابل ښاروالۍ د استملاک ریاست سرپرست انجنیر امید الرحمن رحماني په دې اړه وویل: د دغه سړک په اوږدو کې(۵۰۱) ملکیتونه استملاک شوي چې د استملاک قانون له مخې یې مالکانو ته د حقونو د ورکړې بهیر هم پیل شوی دی. نوموړي زیاته کړه چې، د دغه مهم نښلوونکي سړک د جوړولو چارې د کابل ښار د اقتصادي ودې لپاره د زمینې برابرولو په موخه، د ماسټر پلان له مخې ترسره کېږي. د کابل ښاروالۍ د برنامو او پروژو د تنظیم رياست د مسئولینو پهّ وینا، د دغه سړک د جوړولو او پراختيا چارې ښاري زېربناوو ریاست د ډېزاین له مخې، د(٢٧٩٤) مترو په اوږدوالي او (٦٠) مترو په سور سره د خنډونو له پاکولو وروسته پيل او د یوه معیاري سړک د ټولو جزئياتو په ګډون به د (۲۰) کاري میاشتو په موده کې په اساسي توګه بشپړې شي