د نهمې ناحیې اړوند د هوایي ډګر له څلورلارې څخه د کابل - جلال آباد تر سړک پورې د نوي نښلوونکي سړک د جوړولو پر وړاندې د خنډونو او تر استملاک لاندې ملکیتونو د ویجاړولو او پاکولو چارې، دکابل ښاروالۍ له خوا روانې دي. د دغه سړک په اوږدو کې (۵۰۱) ملکیتونه استملاک شوي چې د استملاک قانون له مخې یې مالکانو ته د حقونو د ورکړې بهیر هم پیل شوی دی. د کابل ښاروالۍ د برنامو او پروژو د تنظیم رياست د مسئولینو پهّ وینا، د دغه سړک د جوړولو او پراختيا چارې به د ډيزاين له مخې، د( ٢٧٩٤) مترو په اوږدوالي او (٦٠) مترو په سور سره د خنډونو له پاکولو وروسته پيل او د یوه معیاري سړک د ټولو جزئياتو په ګډون به د (۲۰) کاري میاشتو په موده کې په اساسي توګه بشپړې شي. د دغه مهم نښلوونکي سړک د جوړولو چارې د کابل ښار د اقتصادي ودې لپاره د زمینې برابرولو په موخه، د ماسټر پلان له مخې ترسره کېږي.