په اتمه ناحیه کې د ستانکزي له بلاکونو څخه د کارته نو تر سړک پورې د رحمان مېنې د(E) برخې سړک د جوړولو چارې د کابل ښاروالۍ له خوا روانې دي. د کابل ښاروالۍ د برنامو او پروژو د تنظیم رياست د معلوماتو له مخې، دغه سړک په ټولیزه توګه (٣٣٠٠) متره اوږدوالى او بېلابېل سور لري، چې له ستانکزي بلاکونو څخه تر هېوادوال بلاکونو او د اتمې ناحيې پر لور يې دقیر چارې ترسره شوې او د پاتې برخې به یې د بنسټیزو چارو تر بشپړېدو وروسته په راتلونکو ورځو کې پیل شي. اوس مهال د یاد سړک د پلولارو او ګلدانونو د جوړولو، د څراغونو نصبولو، د کرنیزې خاورې د لېږدولو او په ګلدان کې یې د نیالګیو اېښودلو کار روان دی. د کار د ښه کیفیت د تضمین په موخه، او په بېلابېلو پړاوونو کې د دغې پروژې له پلي کېدو څخه د کابل ښاروالۍ د اړوندو مسئولینو له خوا په فني او تخنیکي توګه څارنه ترسره کیږي