د کابل ښاروالۍ اداري شورا د ښاري پلانونو او برنامو د پلي کېدو په اړه د کابل ښاروال مولوي عبدالرشید په مشرۍ غونډه ترسره کړه. په دې غونډه کې چې، د یادې ادارې مرستیالانو، د مرکزي ادارو او ناحیو رئیسانو ګډون کړی وو، د یو ویشتمې ناحیې د پلاني کولو په برخه کې د امیرالمؤمنین د فرمان پلي کولو، په ودانیو کې د فاضلاب تصفیه کولو خونو د سیستم جوړولو دکړنلارې، د دوه ویشت ګونو ناحیو د ګذرونو د ویش، په زرغونو سیمو کې د ونو د پرېکولو له امله د تاوان اخیستلو د څرنګوالي، ګذر وکیلانو ته د پېژند کارت وېشلو ، د ناحیو په کچه له کابل ښاروالۍ سره د همکارو شوراګانو لپاره د کړنلارې جوړولو او د یو شمېر نورو ښاري مسایلو په اړه بحث او خبرې وشوې. کابل ښاروال ښاریانو ته د غوره خدمتونو وړاندې کولو پر چټکتیا ټینګا وکړ او په دې برخه کې یې اړوندو مسئولینو ته اړینې سپارښتنې وکړې. دغه راز کابل ښاروال وویل چې، د دندو په ترسره کولو کې باید اغېزمن او ګټور ګامونه واخیستل شي څو ښاریانو ته د هوسا ژوند زمینه برابره شي. همدارنګه کابل ښاروال زیاته کړه چې، ټول ښاریان دې د ښاري پلانونو او برنامو په پلي کولو کې له دې خدماتي ادارې سره هر اړخیزې مرستې وکړي