د بغلان ولایت له سېلاب ځپلو سره د همدردۍ په موخه، په بېلابېلو ناحیو کې د کابل ښاروالۍ له لوري له خلکو د مرستو راټولولو لړۍ روانه ده. د اوومې ناحیې د رئیس مولوي عبدالغفور غفوري په وینا؛ د یادې ناحیې په بېلابېلو سیمو کې د مرستو راټولولو لپاره،(۹) خیمې درول شوې دي ترڅو سیمه ییزې شوراګانې مرستې راتولې او د کابل ښاروالۍ د خلکو د همغږۍ چارو ریاست له لارې یې پېښو ته د رسېدنې کمیسیون ته وسپاري. نوموړي زیاته کړه: د یادې ناحیې د ګذرګاه له نوي پله، اغا علي شمس، تخنیکم، پل حسن، چهلستون، دوغ آباد، علاء الدین درې لارې، ده مرادخان او ریشخورو له سیمو څخه مرستې د راټولېدو په حال کې دي چې، نغدې پیسې، جامې او د کور نور اړین توکي پکې شامل دي. د مرستو راټولولو دغه لړۍ به په بېلابېلو ناحیو کې دوام ولري او هڅه کیږي چې، راټولې شوې مرستې هرڅه ژر بغلان ولایت ته ولیږدول شي