د دويمې ناحيې اړوند د نادرپشتون په سيمه کې د خيرخواه تجارتي مارکېټ د جوړولو چارې، د خصوصي سکټور (ملي سوداګرو ټولنې) په مرسته د چارو ادارې تر مديريت لاندې روانې دي. یاد مارکېټ د اقتصادي ودې په موخه، د کابل ښاروالۍ له پلان سره سم په ۱۰۴۰۰ متر مربع ځمکه کې په پرمختللي او معیاري ډول په ۹ پوړونو کې د څه باندې ۳۲ میلیونه ډالرو په لګښت جوړېږي چې تر دې دمه یې ۹۰ سلنه چارې مخته تللې دي. د دې مارکېټ ۲ پوړونه د ۱۷۰۰ موټرو د پارکینګ لپاره ډیزاین شوي دي. په همدې توګه د دغه مارکېټ په ډيزاين کې د اصنافو د ۳ برخو ( برېښنايي توکو، الکتریک وسایلو او موبایل پلورونکو) لپاره ۱۷۰۰ هټۍ ، د نندارتون ځای، جومات، سپورټي لوبغالی، رستورانت او تفريحي ځای هم په پام کې نيول شوي دی. دغه راز په دې مارکیټ کې اړینې آسانتیاوې لکه: ښاري او لمریزه برښنا او د اور وژنې او خوندیتوب مسایل هم په نظر کې نیول شوي دي. دغه مارکېټ د مالیې وزارت، ملي بانک، کابل ښاروالۍ او خصوصي سکتور ملکیت دی. په وروستيو کې د دغه مارکېټ مخې ته د ٣٢٠٠ متر مربع په پراخوالي له تیږو څخه پلې لارې هم جوړې شوې دي چې، پلو لارویانو ته یې د آسانتياوو رامنځته کولو تر څنګ د يادې سيمې ښکلا هم زياته کړې ده