د چاپېریال او هوا له ککړتیا څخه د مخنیوي په موخه د کابل ښاروالۍ له لوري د اوولسمې ناحیې په اړوند سیمو کې لښتیو ته د فاضلاب له لېږدولو مخنیوی وشو او سرغړونکي له سپارښتنو او تادیب سره مخ شول. د اوولسمې ناحیې د مرستیال مولوي ذبیح الله نبي خیل په وینا؛ د یادې ناحیې په کچه له کورونو څخه لښتیو ته د فاضلاب پرېښودل شویو لارو د بندولو لړۍ په جدي توګه روانه ده. نوموړي زیاته کړه: ښاریان باید د خپلو کورونو د فاضلاب لپاره جذب نه لرونکې سپتیک څاګانې وکیندي او لښتیو او کانالونو ته د فاضلاب لارو له را پرېښودلو څخه ډډه وکړي. د یادونې وړ ده چې، د کابل ښاروالۍ د چاپېریال ساتنې او چاپېریالي روغتیا ریاست په بېلابېلو ناحیو کې د هوا او چاپېریال له ککړتیا څخه د مخنیوي په موخه له سرغړونکو څخه لیکل شوې ژمنې اخیستې دي ترڅو د خپلو ودانیو د فاضلاب لارې لښتیو، کانالونو او کابل سیند ته را پرېنږدي. له دې پرته به له جدي قانوني چلند سره مخ شي