کابل ښاروال مولوي عبدالرشید د اوولسمې ناحیې د اوسېدونکو له خوا د هغه د ارزښتناکو او ګټورو خدمتونو د ترسره کولو له امله وستایل شو. په هغه ستاینغونډه کې چې له همدې امله جوړه شوې وه، د اوولسمې ناحيې اوسېدونکو د خيرخانې کوتل، له ذاکرين ښارګوټي څخه تر قرغې پورې د عمومي سړکونو او د دې ناحیې په بېلابېلو سيمو کې د فرعي سړکونو د جوړولو په برخه کې دکابل ښاروالۍ کړنې، کابل ښاروال ته د عزت پګړۍ او د ویاړ چپنې په ډالۍ کولو سره وستایلې. دغه راز کابل ښاروال د خپلو خبرو په ترڅ کې ځان د کابل ښاریانو خدمتګار وباله او زیاته یې کړه: د خلکو خوښي او ملاتړ موږ ته دا روحیه راکوي چې، د ننني عصر د اړتیاوو سره سم د باکیفیته خدمتونو د وړاندې کولو لپاره ګامونه پورته کړو. نوموړي هیله څرګنده کړه چې، د ښاري برنامو او پلانونو په پلي کېدو کې د ټولو ښاریانو مرسته اړینه ده. کابل ښاروال زیاته کړه: د متوازنې پراختیا د اصولو پر بنسټ او د خپلو شته امکاناتو او سرچینو په پام کې نیولو سره به د ښاري قوانینو او مقرراتو سره سم، د بېلابېلو ناحیو د اوسېدونکو ستونزو ته رسېدنه وشي