د کابل ښاروالۍ په وړاندیز او د ریاست الوزراء د محترم مقام په منظورۍ، ښاغلی مصطفی نبي خیل د کابل ښاروالۍ د عوایدو ریاست د نوي رئیس په توګه ټاکل شوی او د کابل ښاروالۍ مقام دفتر د رئیس حافظ عبدالقدیر حقاني له لوري خپلو همکارانو ته ور وپېژندل شو. په هغه پېژندغونډه کې چې له همدې امله جوړه شوې وه، د کابل ښاروالۍ مقام د دفتر رئیس د یادې ادارې د مشرتابه ټولې لارښونې په ځانګړې توګه په معیاري توګه د ښاري خدمتونو د محصول راټولولو په برخه کې بیان کړې او ویې ویل: د نوي رئیس په ګمارنې سره به د یاد ریاست په چارو کې مثبت بدلون راشي او په چارو کې يې د مسؤلیت منلو او رښتینولۍ په اصل ټينکار وکړ . ښاغلي نبي خیل د کمپیوټر ساینس او د مسلکي محاسبې په برخو کې لوړې زده کړې ترسره کړي، او په مالي او عوایدي چارو کې غوره تجربه لري.د يادونې وړ ده، چې کابل ښاروالۍ څه باندې ٣٠ عوایدي سرچينې لري، چې پربنسټ يې ښاري چوپړتیاوې وړاندې کېږي