د چارو د غوره رهبرۍ او مدیریت په موخه، د کابل ښاروالۍ اړوند ریاستونو مرستیالانو ته د ظرفیت لوړونې شپږ ورځنی ورکشاپ د یادې ادارې د پلان جوړونې او ښاري پراختیا د مرستیال ډاکتر صدرالدین تاجک په وینا پیل شو. ښاغلي تاجک په خپلو خبرو کې وویل: په دې ورکشاپ کې به ګډونوالو ته د بشري سرچینو ریاست د ظرفیت لوړونې آمریت له لوري د دندې پر مهال د ستونزو او تېروتنو له منځه وړلو، د مدیریتي او مسلکي مهارتونو د لوړولو، رښتینولۍ، پلان جوړونې، همغږۍ، رهبرۍ، د فعالیتونو د کنټرول، د زیانمنونکو ټکو پیژندلو او هغه ته د رسېدنې او د قوانینو او اصولو پر بنسټ د چارو ترسره کولو په اړه معلومات وړاندې شي. نوموړي زیاته کړه: زموږ موخه خلکو ته د یوې خدمت کوونکې ادارې رامنځته کول دي ترڅو د دې ورکشاپ له لارې د کابل ښاروالۍ بېلابېلې څانګې ښاریانو ته د معیاري او پر وخت د چوپړتیاوو وړاندې کولو ته لا ښه چمتو شي