کابل ښاروالۍ له قیصر افغان ودانیز شرکت سره د لب جر له څلورلارې څخه تر سرای شمالي څلورلارې پورې (د سلطان محمود غزنوي سړک دوام) د سړک جوړولو چارې له قرارداد څخه د سرغړونې له امله لغوه کړې. د کابل ښاروالۍ د ودانیزو چارو مرستیال انجنیر عامر یاسر زمرک په دې اړه وویل: د دغه سړک د جوړولو چارې چې، د کابل ښاروالۍ د پخوانۍ ادارې له خوا له قيصر افغان ودانیز شرکت سره قرارداد شوى و؛ د قرارداد د مادو په رعايتولو کې د غفلت او پاتې راتلو له امله د کار د دوام اجازه ورنکړل شوه او له تخنيکي او فني څېړنو وروسته له ياد شرکت سره د دغه سړک د جوړولو قرارداد فسخ شو. نوموړي زياته کړه: د يوه کانال په ګډون د دغه سړک د جوړولو چارې چې پخوا د ياد شوي شرکت له خوا ترسره شوې وې، په بشپړه توګه غیر معیاري او بې کیفیته دي، چې د کابل ښاروالۍ د کار، ساتنې او څارنې ریاست له خوا به ویجاړ او په معیاري ډول به بیاځلي جوړ شي. د کابل ښاروالۍ مشرتابه ټینګار کوي، چې د سړک جوړولو چارې باید د طرحه شوي ډیزاین، معیاري کیفیت او د ټاکلي وخت مطابق په پوره ایماندارۍ او صداقت سره ترسره شي،او په دې برخه کې کوچنۍ سرغړونه هم د منلو وړ نه ده،ترڅو د عامه شتمنۍ د ضایع کیدو مخه ونیول شي. د سلطان محمود غزنوي سړک د دوام چارې چې، (۲۰۵۲) متره اوږدوالی او (۷۰) متره سور لري، د کانالونو، پلولارو، څراغونو، لښتیو، د بایسکل چلولو کرښو او ګلدانونو په ګډون به د روان کال په بهیر کې په معیاري او اساسي ډول ترسره شي. دغه پروژه د کابل په شمال کې د سړک جوړونې له مهمو پروژو څخه ده چې په جوړېدو سره به يې د سیمې د اوسیدونکو او ښاریانو ګڼ شمېر ستونزې حل شي