د ودانیزو سرغړونو د مخنیوي په اړه غونډه تر سره شوه! د کابل ښاروال مولوي عبدالرشید په مشرۍ د یادې ادارې د تخنیکي او فني مسئولینو په ګډون له اجازې پرته د خپلسرو ودانیو د جوړولو د مخنیوي، او ودانیزو سرغړونو ته درسېدنې په اړه غونډه ترسره شوه. په غونډه کې کابل ښاروال د ښاري سرغړونو د مخنیوي په موخه، د قانون د مادو او کړنلارو په اړه رڼا واچوله او ویې ویل: ښاري سرغړونې او خپلسري، په ځانګړې توګه د غیر معیاري او غیر قانوني ودانیو د جوړولو په برخه کې له پخوا ډېرې څارل کیږي. د نوموي په وینا هغه ښاریانو ته چې، غواړي ودانۍ جوړې کړي، د ودانیز جواز، ښاري قوانینو او ټاکل شویو شرایطو مطابق آسانتیاوې برابرې شوې دي. اوس مهال د ښار په کچه د ناقانونه ودانیو د جوړولو کچه راټېټه شوې او په دې وروستیو کې د کابل ښاروالۍ د اساسي ودانیو د کنټرول ریاست د مسئولینو له لوري د لسګونو ودانیزو سرغړونو مخه نیول شوې ده. او همدارنګه په سلګونو ښاریانو بیا د ودانیو د جوړولو لپاره له کابل ښاروالۍ څخه د ودانیو جوړولو جواز تر لاسه کړی، او کارونه يې عملاً جریان لري. په پلاني او غیر پلاني سیمو کې د ودانیو جوړولو شرایط توپیر لري او د سندونو د پړاونو له ترسره کولو وروسته ښاریانو ته د ودانیو جوړولو اجازه ورکول کیږي. د ښار معیاري وده د اصولو او قوانیو مطابق د ودانیو په جوړولو پورې تړلې ده. هېڅ حکمي او حقیقي شخص نشي کولای له جواز پرته ودانۍ جوړه کړي، د سرغړونې په صورت کې به له قانوني چلند سره مخ شي.