د کابل ښاروالۍ د مسئولانو او د یوولسمې ناحیې د یو شمېر مشرانو او ښاریانو په ګډون د یادې ناحیې په کچه د ونو او زرغونو سیمود خړوبولو حشر ترسره شو چې، په پایله کې یې ګڼ شمېر ونې او زرغونې سیمې خړوب شوې. د یوولسمې ناحیې رئیس مولوي ذبیح الله نبي خیل د حشر له ګډونوالو څخه د مننې ترڅنګ وویل: د ونو او زرغونو سیمو ساتنه او خړوبول یوازې د کابل ښاروالۍ مسئولیت نه دی، بلکې په دې برخه کې ټول ښاریان باید لاس په کار شي. نوموړي زیاته کړه: د ونو او زرغونو سیمو خړوبول زموږ ملي او دیني دنده بلل کیږي او هېڅ وخت باید خپله دا دنده هېره نه کړو.
ښاغلي نبي خیل وړاندې وویل: د یوولسمې ناحیې ښاریانو د اوبو د ټانکرو په چمتو کولو سره د ښار په زرغونتیا کې برخه واخیسته او دې کار ته به دوام ورکوي. کابل ښاروالي د زرغونو سیمو د پراختیا په برخه کې بې درېغه هڅې کوي، خو سخته ده چې د ښاریانو له مرستې پرته خپل پلانونه په سمه توګه پلي کړي. ورته مهال د یادې ناحیې اوسېدونکو ژمنه وکړه چې، د خپلو سیمو زرغونتیا او خړوبولو ته به پام کوي، ځکه زرغونې سیمې د انسان په ژوند کې حیاتي رول لري.