د ترانسپورتي، ټولنیزو او ښاري آسانتیاوو رامنځته کولو په موخه، د(۲۵۲۰) مترو په اوږدوالي او (۶۰) مترو په سور سره د اوولسمې ناحیې اړوند د خیرخانې کوتل سړک د دویمې برخې د جوړولو چارې په چټکۍ سره روانې دي. دغه سړک په څلورو لیکو کې (دوه اصلي او دوه فرعي) د لښتیو، پلو لارو، د بایسکل چلولو لیکو، ګلدانونو، څراغونو نصبولو، تم ځایونو، کرښو اچولو، ترافیکي نښو نصبولو او د یوه معیاري سړک د ټولو برخو په ګډون جوړیږي. اوس مهال د یاد سړک د لښتیو جوړولو، کیندنو او خاورې لېږدولو چارې روانې دي. د خیرخانې کوتل سړک د دویمې برخې جوړول د کابل ښار د تلپاتې اقتصادي او ټولنیزې ودې په برخه کې ځانګړی اهمیت لري چې، په جوړېدو سره به یې د هېوادوالو ترافیکي ستونزې حل او ګڼ شمېر آسانتیاوو ته به لاس رسی ومومي. د یادونې وړ ده چې، د یاد سړک د لومړۍ برخې د جوړولو چارې چې، تېر کال د کابل ښاروالۍ له لوري پیل شوې وې، د بشپړېدو په حال کې دي.