کابل ښاروال مولوي عبدالرشید د اتمې ناحیې اړوند په کارته نو سیمه کې د خصوصي سکټور د یو شمېر متشبیثینو له لورې جوړه شوې طرحه و ارزوله او د لا بډاینې په برخه کې یې خپل نظرونه او وړاندیزونه شریک کړل. کابل ښاروال وویل: پلان لرو چې، دا سوداګریز مارکېټ په بنسټیزه توګه د خصوصي سکټور په مرسته جوړ کړو ترڅو د کابل ښار تلپاتې ودې او خوندي پانګې اچونې ته زمینه برابره شي. د نوموړي په وینا کابل ښاروالي د خصوصي سکټور لپاره د پانګونې زمینه برابروي ترڅو له یوه لوري کابل ښار لا ډېر آباد او له بل لوري د یادې ادارې په عوایدو کې زیاتوالی شي. په همدې توګه کابل ښاروالي له خپلو ملکیتونو څخه د سمې ګټې اخیستنې او د پانګې اچونې د ودې په برخه کې ارزول شوي پلانونه لري چې، د ښار په بېلابېلو برخو کې به یې یو پر بل پسې پلي کړي.