ګډو کارونو ته د ښاریانو هڅولو او د ښاري کلتور دودونې په اړه د عامه پوهاوي د لړۍ پر دوام په پنځمه ناحیه کې د ونو او زرغونو سیمو د خړوبولو حشر ترسره شو. په دې حشر کې د کابل ښاروالۍ مسئولانو، د عالمانو، ځوانانو او ګذر وکیلانو شوراګانو استازو ګډون کړی وو او ټولو ژمنه وکړه چې، د ښار د آبادۍ او زرغونتیا په برخه کې به له کابل ښاروالۍ سره همکار و اوسي. ورته مهال د پنځمې ناحیې مرستیال حافظ مرجان حیدر ښاریان د ونو او زرغونو سیمو خړوبولو او ساتنې ته راوبلل او ویې ویل: کابل ښاروالي په یوازې ځان نشي کولای د ښار ټولو زرغونو سیمو او ونو ته رسېدنه کړي؛ په دې برخه کې باید ټول ښاریان خپل دیني او ملي مسئولیت ادا کړي. په همدې توګه د کابل ښاروالۍ د خپرونو او عامه پوهاوي ریاست د عامه پوهاوي آمر محمد یاسین امین د ښاري کلتور د دودونې او د مسئولیت منلو احساس د ژوندي کولو په اړه خبرې وکړې او ویې ویل: د سوکاله ښاري ژوند هیلو ته د رسېدو په برخه کې د ښاریانو او مسئولانو ترمنځ همغږي او همکارۍ ته اړتیا ده. د نوموړي په وینا اسلام د نظم دین دی او د ژوند د ټولو برخو لپاره ځانګړي اصول لري. د ښاغلي امین په وینا؛ ونو ته اوبه ورکول هم د اسلام مبارک دین له لارښوونو څخه دي.