د اتمې ناحیې اړوند د ۳۳۰۰ مترو په اوږدوالي او د ۱۱.۵، ۱۲.۵ او ۴۰ مترو په سور سره د رحمن مېنې د E برخې سړک دویمه طبقه قیر چارې بشپړې او د ترافیکو پر مخ پرانیستل شو. د کابل ښاروالۍ د پروګرامونو او پروژو د تنظیم ریاست د زیربنايي پروژو د څارنې آمر انجنیر محمد حامد سادات وویل: له ستانکزي بلاکونو څخه تر کارته نو سړک پورې د دې سړک د جوړولو چارې چې تېر کال پیل شوې وې ، تر دې مهاله ۹۵ سلنه مخته تللې دي او هڅه کیږي ترڅو هرڅه ژر بشپړې شي. نوموړي زیاته کړه چې، د پروژو او پروګرامونو د تنظیم ریاست مسئولان د پروژې له کیفیت څخه پر وخت تخنیکي او فني څارنې کوي او د سړک جوړونې دا لویه پروژه نښلوونکي کانالونه، لښتي، ګلدانونه، پلې لارې، تم ځایونه، د بایسکل چلولو لیکې او د یوه معیاري سړک نور جزئیات په بر کې نیسي. دا پروژه له خورا ارزښت څخه برخمنه ده چې، په بشپړېدو سره به یې ښاریانو ته د تګ راتګ په برخو کې ګڼې آسانتیاوې رامنځته او د سیمو اقتصادي ودې ته به زمینه برابره شي.